Çmimet e apartamenteve në Tiranë pritet të rriten gjatë vitit 2025, për shkak të faktorëve si rritja e kostove të ndërtimit, pagat e punëtorëve, çmimet e materialeve ndërtimore dhe taksat për ndikimin në infrastrukturë. Këta faktorë janë të rëndësishëm për ndikimin e vazhdueshëm të çmimeve në tregun e pasurive të paluajtshme në kryeqytet.
Kryetari i Shoqatës së Ndërtuesve të Shqipërisë, Erjon Harizi, thotë se në kryeqytet, zonat ku do të ketë rritje të çmimeve do të jenë ato afër qendrës.
“Në disa zona si brenda Unazës së Vogël, Bulevardi i Ri, dhe ish-fusha e Aviacionit, çmimet kanë tendencë për rritje gjatë vitit 2025”, thotë z. Harizi.
Kërkesa për blerje pronash mbetet e ulët në Tiranë për shkak të çmimeve të larta dhe emigrimit, sidomos të të rinjve. Ndërtuesit presin që ky trend të vazhdojë, duke u orientuar disa grupe të popullsisë drejt mundësive me qira afatgjatë. Po ashtu, kërkesa për prona nga burime të padeklaruara financiare pritet të bjerë pas hetimeve të fundit që lidhen me aktivitete kriminale dhe politikën.
Për Kryetarin e Shoqatës së Ndërtuesve të Shqipërisë, faktorët kryesorë që do të ndikojnë në shtrenjtimin e çmimeve mbeten rritja e kostos nga pagat e punëtorëve, shtrenjtimi i materialeve të ndërtimit dhe kostoja nga rritja e taksës së ndikimit në infrastrukturë.
“Kostot e ndërtimit pritet të rriten gjatë vitit 2025, ku ndoshta zërin kryesor e zë fuqia punëtore. Sektori ballafaqohet gjithashtu me mungesë fuqie punëtore. Edhe cilësia e ndërtimit është në rritje, pasi ndërtuesit përdorin materiale më cilësore.
Shtim të kostove ka edhe nga rritja e detyrimit nga taksa e ndikimit në infrastrukturë dhe taksës së strehimit që erdhi pas ndryshimit të çmimeve të referencës”, pohon ai.
Rritja e taksave, si ajo për ndikimin në infrastrukturë, ka shtuar presionin mbi çmimet e apartamenteve në Tiranë. Taksa e tillë llogaritet mbi çmimet e referencës, të cilat janë rritur deri në 76% në disa zona që prej gushtit 2023, duke përkeqësuar më tej përballueshmërinë e tregut të pasurive të paluajtshme.
Ndërkohë që ndërtimi i objekteve të reja vazhdon me ritme të shpejta, shumë prej këtyre objekteve nuk plotësojnë nevojat reale të popullsisë për banim ose hapësira biznesi, duke çuar në një mbingopje të tregut që nuk përputhet me kërkesën aktuale. Për vitin 2025, pritet një rritje e mëtejshme e çmimeve të apartamenteve në Tiranë, ndërsa kërkesa për këto prona mbetet e kufizuar./Monitor
