Një ngjarje tragjike ka tronditur komunitetin shqiptar në SHBA, ku çifti Pajtim dhe Sabrina Krasniqi, nga Kosova, janë gjetur pa jetë në apartamentin e tyre në Florida.
Policia amerikane ka raportuar se 27-vjeçarja Sabrina ka qëlluar disa herë për vdekje bashkëshortin e saj, Pajtimin, përpara se të kryente vetëvrasje.
Ngjarja ndodhi në orët e para të mëngjesit, ku raportohet se janë dëgjuar së paku gjashtë të shtëna të njëpasnjëshme. Pas të shtënave, policia dhe hetuesit lokalizuan viktimat në ballkonin e apartamentit, një burrë i shtrirë me fytyrë poshtë dhe një grua në shpinë.
Tragjedia ka lënë të shokuar familjarët dhe miqtë e çiftit, ndërsa komuniteti shqiptar në SHBA dhe më gjerë po përjeton këtë humbje të rëndë me dhimbje dhe pikëllim.
Nuk dihen ende motivet që cuan në këtë akt të rëndë, ndërsa hetimet po vazhdojnë për të zbuluar rrethanat e plota të ngjarjes.
“Gruaja e Pajtimit zgjodhi t’ia merrte jetën vëllait tim, kur ajo e qëlloi me 5 plumba në kraharorin e tij. Personit të cilin i besonte kaq shumë, personin të cilin e zgjodhi të kalonte jetën edhe ia mori. Ajo e tradhtoi atë, dashurinë dhe besimin e tij. Ajo e shkatërroi familjen time. Unë dhe vëllezërit e motrat e mia nuk do të jemi më kurrë njësoj. Jam e tmerruar që nëna ime nuk do ta kalojë kurrë këtë. Festën e Falënderimeve nuk e kalova me burrin dhe fëmijët e mi. Nuk e kalova me miqtë e mi. Këtë ditë e kalova me policët, hetuesit dhe lajmet që flisnin për vrasjen e egër dhe të pakuptimtë të vëllait tim të vogël nga gruaja e tij”, shkroi motra e viktimës në një postim prekës.
