Edicioni dhe formati i ri i Champions League ka nisur me emocione të mëdha dhe shumë gola. Pas dy dueleve të orës 18:45, ku u shënuan 7 gola, 4 takimet e mbrëmjes u shënuan në total plot 21 gola. Në fakt 11 gola u shënuan vetëm në një takim, pikërisht në Bavari, atje ku Bajerni i Mynihit turpëroi keqazi me rezultatin 9 me 2 Dinamon e Zagrebit, në duelin ku ishte në fushë edhe Arbër Hoxha, i cili u aktivizua në minutën e 73-të. Protagonisti absolut i bavarezëve ishte Herri Kejn, që shënoi plot 4 gola.
Triumf mes vuajtjesh për Realin, që iu fal golave të Mbape, Rudiger dhe Endrik në pjesën e dytë në duelin ndaj Shtutgart, që përfundoi me rezultatin 3-1. Deri në minutën e 83-të sfida ishte në barazim 1-1, teksa madrilenët shpërthyen në fund, duke shënuar 2 gola me Rudiger dhe Endrik dhe duke marr 3 pikët e para.
Ndërkohë në supersfidën e mbrëmjes, Liverpuli mposhti me përmbysje 1-3 Milanin, në duelin e dominuar nga anglezët. Ishin vendasit e Milanit që shënuan të parët me Pulisic, ndërkohë që golat e Konate dhe Van Dajk, dy mbrojtësit e qëndrës, përmbysën që në pjesën e parë. Në pjesën e dytë, vulosi gjithcka goli i shënuar nga Szoboslai. Fitore mjaft të rëndësishme mori edhe Sportingu i Lisbonës, që triumfoi me rezultatin 2-0 ndaj Lilës.
