U luajtën mbrëmjen e sotme 7 duelet e vlefshme për Ligën e Kampioneve, ku u shënuan në total plot 26 gola. Spikasin triumfet e Arsenalit, Barcelonës, Dortmundit dhe Mançester Sitit, që regjistruan fitore bindëse, duke arkivuar 3 pikë të arta. Festë edhe në kampin e Bajern Levekusen dhe Interit, ndërkohë që e vetmja sfidë që u mbyll në barazim ishte ajo mes PSV dhe Sporting Lisbonës. Sa i takon sfidës në San Siro, Interi mposhti me rezultatin 4-0, serbët e Crvena Zvezdës. Dominim absolut i zikaltërve të Simone Inzagit, që nuk e vendosën për asnjë moment në diskutim, triumfin ndaj skuadrës së Piter Olainkës. Çalhanoglu hapi serinë e golave në minutën e 11-të me një realizim fantastik nga goditja e dënimit. Pjesa e parë u mbyll me rezultatin 1-0, teksa në fragmentin e dytë, zikaltrit shënuan edhe 3 herë të tjera me sulmuesit Aranutoviç, Lautaro Martinez dhe Taremit.
Me këtë fitore Interi u ngjit në kuotnë e 4 pikëve, Duelin e radhës Interi e luan në transfertë ndaj Jang Bojs. Për Crvena Zvezdën, kjo ishte humbja e dytë radhazi. Serbën në duelin e radhës do të luajnë në transfertë ndaj Monakos. Ndërkohë në BayArena, Milani pësoi humbjen e dytë në Champions pas asaj me Liverpulin. Ndërkohë Bajer Leverkuseni ka marrë një tjetër fitore duke shkuar në kuotën e 6-pikëve. Heroi i kësaj sfide padyshim ishte Bonifejs i cili shënoi golin e vetëm të kësaj sfide.
Ai realizoi edhe në minutën e 21-të, por goli u anulua për pozicion jashtë loje. Ndërkohë kuqezinjtë e Fonsekës pretenduan dy herë për penallti, por nuk iu aprovuan në asnjë rast.
