Ish-kryeminsitri Sali Berisha në javën e fundit të dhjetorit i vendosi një afat për të liruar zyrën kreut aktual të Partisë Demokratike, Lulzim Bashës.
Ndërkohë që sot, më datë 5 janar është dita kur përfundon afati që Komisioni i Rithemelimit të PD-së, që i ka kërkuar kryedemokratit Lulzim Basha që të lirojë zyrën. Kjo pasi Komisioni i Rithemelimit vendosi përmes një referendumi shkarkimin e Bashës nga drejtimi i PD-së.
Më pas përmes një njoftimi, ky komision i la një afat Bashës që të lironte zyrën. Berisha ka kërcënuar se do të shkojë në ‘shtëpinë e demokratëve’, teksa Basha i është përgjigjur duke bërë disa ndryshime në godinë, duke blinduar derën kryesore e duke u përgatitur për ndonjë skenar të mundshëm.
Nuk dihet se çfarë do të ndodhë sot në selinë e partisë më të madhe opozitare në vend, ndërsa Lulzim Basha ka theksuar se situata do të vijojë në normalitet, pa ngjarje të pazakonta.
Ditën e djeshme ka pasur një përplasje virtuale mes Komisionit të Rithemelimit dhe PD të Bashës. Komisioni i Rithemelimit tha se Basha Partinë Demokratike po e kthen në një bunkier ndërkohë që kryedemokrati u shpreh se ish-kryeministri Berisha po nxit dhunë me deklaratat dhe aktet e tij.
Lideri historik i Partisë Demokratike, Berisha do të udhëheqë një protestë kombëtare, disa javë pas asaj që thirri kundër vizitës së presidentit serb Aleksandar Vuçiç në Tiranë.
