Anëtari i Kryesisë së PD-së, Çlirim Gjata në një deklaratë për mediat është shprehur se Parlamenti me në krye Lindita Nikollën po kundërshton me forcë Gjykatën Kushtetuese, me urdhër të Ramës për të mbrojtur deputeten, Olta Xhaçka.
Opozita nuk pajtohej me mandatin e deputetes, Olta Xhaçka, pasi bashkëshorti i saj, Artan Gaçi u shpall “investitor strategjik” nga qeveria.
Kujtojmë se shumica e anëtarëve në Gjykatën Kushtetuese i dha të drejtë kërkesës së 1/10 së deputetëve të opozitës, duke i rrëzuar si antikushtetuese vendimet e Kuvendit për dy raportet e Këshillit të Mandateve lidhur me mandatin e Xhaçkës.
DEKLARATË PËR MEDIA E ANËTARIT TË KRYESISË SË PD, ÇLIRIM GJATA
Ka kaluar një vit që nga koha kur Gjykata Kushtetuese vendosi që Kuvendi i Shqipërisë të shprehej per mandatin e deputetes Olta Xhaçka, të cilin Partia Demokratike e paditi si të rënë, për shkak të konfliktit të interesit.
Lindita Nikolla që njeh për ligj dëshirat e Edi Ramës dhe jo Kushtetutën e Republikës mbi të cilën ka bërë be në rrenë, e shpërfill me guxim cubash Gjykatën. Ajo refuzon të fusë në kalendarin e seancave kërkesën e opozitës, miratuar nga Kushtetuesja, në mënyrë që Kuvendi të shprehet nëse Olta Xhaçka ka votuar në konflikt interesi që, qeveria, në një prej mbledhjeve, të shpallë investitor strategjik bashkëshortin e vet.
Kjo vonesë skandaloze dëshmon se si parlamenti i Lindës nuk është gjë tjetër veçse një zorrë qorre e verbërisë për pushtetet të Edi Ramës dhe rilindave të tij.
Ky është dy herë veprim anti-kushtetues, një herë nga qeveria dhe një herë nga parlamenti, cka e bën ngrehinën e pushtetit të jashtëligjshme dhe neveritëse.
Edi Rama, që firmos ‘fap e fap’ cdo vendim që lidhet me xhepin, nuk jep Lindës lejen që ajo të fusë në agjendën parlamentare kërkesën e Gjykatës Kushtetuese “deputeten strategjike” Xhaçka.
Deklarimi i kryetares së kësaj Gjykate, se është e paimagjinueshme të vësh në pikëpyetje vendimin e Kushtetueses, nuk do të thotë gjë për Lindën e Ramës në Parlament.
E vetmja pikëpyetje që ajo nuk mund të vendosë kurrë, është pas dëshirave të Edi Ramës.
Partia Demokratike e rithekson qëndrimin e kahershëm se Parlament nuk ka sa kohë nuk ka ndarje pushtetesh. Ndarje pushtetesh nuk ka, sa kohë në pushtet është Edi Rama. Kuvendi, Presidenti, pushteti lokal, drejtësia, janë të gjitha mashë që Rama përdor për të mos e djegur zjarri i qindra zullum-hajdutërive.
Kur nuk respekton një gjysmë-vendim të Kushtetueses, me te cilin gjykata si seksion i PS ne vend te konstatimit te pavlefshmerise se mandatit të Xhaçkës zgjodhi të kërkojë në mënyrë qesharake lejen e parlamentit per te marre vendimin qe i diktonte kushtetuta, dëshmon se Rama nuk njeh më asnjë institucion kontrollues keshillues apo korrektues sepse ai defakto nuk njeh dhe e shpërfill Kushtetutën e Shqipërisë.
Në këto kushte ka vetëm një rrugë: ai duhet nxjerrë me gjithë leckat pseudo-artistike nga zyra. Bashkë me të, duhen hedhur në gropën haxhiqamiliste të lakejve anti-shtet të gjitha lindat e pushtetit të tij.
O sot o kurrë!
