Procesi gjyqësor për dosjen “Metamorfoza” ka hyrë në një fazë vendimtare, ndërsa trupa gjykuese e përbërë nga gjyqtaret Etleva Deda, Flora Hajredinaj dhe Irena Gjoka, pritet të vendosë mbi kërkesat kyçe të parashtruara nga mbrojtësit ligjorë të të pandehurve.
Në seancën e fundit, një numër avokatësh kërkuan ndarjen e çështjes dhe aplikimin e gjykimit të shkurtuar për klientët e tyre.
Avokati Arben Nela, përfaqësues i ish-prokurorit Xhevahir Lita, argumentoi se hetimet ndaj klientit të tij janë të plota dhe kërkoi që ai të gjykohet në mënyrë të veçuar, nëpërmjet procedurës së shkurtuar.
Kërkesë të ngjashme paraqiti edhe Gentian Rumano, avokati i Ardit Hasanbegajt, duke theksuar se: “Kërkesa për gjykim të shkurtuar është bërë që në seancën paraprake.
Nuk ka prova të tjera për t’u paraqitur. Ndarja e çështjes është rrjedhojë logjike e këtij pozicioni.”
Në të njëjtën linjë, përfaqësuesit ligjorë të Astmer Bilalit, Oltion Bistrit dhe Behar Bajroviqit kërkuan gjykim të shkurtuar, ndërsa për ndarjen e çështjes ia lanë vlerësimin gjykatës.
Avokati i Bistrit theksoi se nuk ka kërkesa për prova të reja apo për pavlefshmëri të atyre ekzistuese.
Ndryshe qëndron pozicioni i biznesmenëve Pëllumb Gjoka dhe Edmond Preka, të cilët nuk kërkuan ndarje të çështjes apo gjykim të shkurtuar. Avokati i Gjokës, Gurali Brahimllari, tha se janë ngritur kërkesa për pavlefshmëri të akteve dhe për përdorimin e të dhënave të sistemit “Sky ECC”, por jo për ndarje apo procedim të përshpejtuar.
“Vendimi i Gjykatës Kushtetuese për ‘Sky’ është i paqartë. Megjithatë, ne kemi kërkesa specifike për mënyrën se si janë mbledhur dhe përdorur të dhënat në këtë çështje,” theksoi ai.
Nga ana tjetër, SPAK kundërshtoi ndarjen e çështjes, me prokurorin Arben Kraja që deklaroi se provat e siguruara janë të ndërthurura dhe ndarja e dosjes mund të dëmtonte ecurinë e gjykimit.
“Të dhënat nga ‘Sky ECC’ janë mbështetur nga prova të tjera dhe janë të renditura qartë në fashikullin hetimor. Ndarja do të rrezikonte integritetin e hetimit,” argumentoi Kraja.
Gjykata u tërhoq për të shqyrtuar kërkesat dhe pritet që në seancat e ardhshme të vendosë nëse do të ndajë çështjet dhe nëse do të lejojë gjykimin e shkurtuar për disa prej të pandehurve.
