Ditën e sotme deputeti i Partisë Demokratike, Gazment Bardhi i ka kthyer përgjigje Prokurorisë së Posaçme kundër Korrupsionit dhe Krimit të Organizuar, e cila përmes një letre i kërkoi akt padinë që kishte përmendur në kallëzimin e bërë për nisjen e hetimeve për kryeministrin Edi Rama. Bardhi në letrën e tij thotë se ka dorëzuar akt padinë dhe shpreh besimin në zbardhjen e kësaj çështjeje.
“Gjejmë rastin të shpresim besimin tonë se Prokuroria e Posaçme kundër Korrupsionit dhe Krimit të Organizuar do të kryejë një hetim të plotë, të gjithëanshëm dhe të pavarur mbi këtë çështje,”-shkruhet në letrën e dërguar nga Bardhi për SPAK.
Kujtojmë se ky është reagimi i parë që vjen nga SPAK, kur është bërë një javë nga publikimi i dosjes që nxorri zbuluar dhe takimet e ish-agjentit me kryeministrin Edi Rama. McGonigal ka zhvilluar takime të njëpasnjëshme me kryeministrin Edi Rama dhe dy persona që në dosje emërtohen si ‘Personi A’ dhe ‘Personi B’, që janë përkatësisht Agron Nezaj e Dorian Duçka, të dy të lidhur me qeverinë shqiptare.
Nezaj del në dosje si njeriu që i jep 225 mijë dollarë McGonigal në mënyrë që të ndërhyjë në FBI që të nisë hetimin për personin që po lobonte në SHBA për PD-në, në vitin 2017 kur drejtohej nga Lulzim Basha. Supozohet që bëhet fjalë për Nicolas (Nick) Muzin. Ndërsa Duçka del si njeriu që e shoqëron kudo ish-agjentin, paguan fluturimet e akomodimet e tij, si dhe i përcjell informacionet e nevojshme që do t’i shërbenin në nisjen e hetimit nga FBI. Rama mohon të ketë lidhje me akuzat e ngritura nga McGonigal.
