Partia demokratike ka publikuar në rrjetet sociale një video me deklaratat e kryeministrit të vendit Edi Rama, në lidhje me gjyqet në Arbitrazhin Ndërkombëtar.
Sipas PD, 447 milionë euro nuk do të shkojnë për spitale, shkolla, kopshte, investime në infrastrukturë, ndihmë ekonomike për njerëzit në nevojë, por për të paguar dëmet e shkaktuara nga një pakicë që ka shkatërruar ekonominë dhe po varfëron shqiptarët. Gjithashtu Partia Demokratike ka rikujtuar edhe një herë se në 8 prill 2021 ka depozituar në SPAK kallëzimin për çështjen ‘Becchetti’. Më tej thekson që presin që kjo çështje të hetohet sa më parë, pasi sipas tyre çdo orë vonesë përkthehet në një dëm ekonomik të pakthyeshëm.
“Imagjinoni sa probleme të vogla dhe të mëdha për shqiptarët do të zgjidhte kjo shumë marramendëse, që fatkeqësisht do të kthehet në një peshë për buxhetin e çdo familje, që do të detyrohet të paguajë papërgjegjshmërinë e Edi Ramës. 447 milionë euro nuk do të shkojnë për spitale, shkolla, kopshte, investime në infrastrukturë, ndihmë ekonomike për njerëzit në nevojë, por për të paguar dëmet e shkaktuara nga një pakicë që ka shkatërruar ekonominë dhe po varfëron shqiptarët. Në 8 prill 2021 Partia Demokratike ka depozituar në SPAK kallëzimin për çështjen ‘Becchetti’. Ne presim që ajo të hetohet me përparësi, sepse çdo orë vonesë tashmë përkthehet në një dëm ekonomik të pakthyeshëm për qytetarët”, deklaron PD.
Gjithashtu në videon e publikuar nga PD-ja kryeministri Edi Rama thotë: “Ka disa kohë që është ngulur në opinion ideja që ne kemi humbur arbitrazhe, por nuk kemi humbur arbitrazhe as edhe një”.
