Administrata zgjedhore dhe struktura e saj ishin në fokus të një tryeze të organizuar këtë të martë nga Komisioni Qendror i Zgjedhjeve (KQZ) dhe OSBE, ku morën pjesë palët politike, si dhe institucione ndërkombëtare që monitorojnë zgjedhjet në Shqipëri.
Gjatë diskutimeve, komisioneri shtetëror i zgjedhjeve, Ilirjan Celibashi, theksoi se përvoja e viteve të fundit ka treguar se depolitizimi total i administratës zgjedhore në të gjitha nivelet është shumë i vështirë, pasi partitë politike shpesh nuk e pranojnë rezultatin e zgjedhjeve.
Nga ana e tij, nënkryetari i PD-së, Oerd Bylykbashi, e theksoi se komisionet zgjedhore dhe administrata zgjedhore duhet të mbeten bipartizane, ashtu siç kanë qenë deri më tani.
Përfaqësuesja e PS-së, Elena Xhina, kërkoi një angazhim më të madh nga KQZ dhe aktorët politikë për të investuar në trajnime për administratën zgjedhore.
Në tryezë mori pjesë edhe përfaqësuesi i Komisionit të Venecias, Sasa Zagorc, i cili theksoi rëndësinë e një administrate zgjedhore të pavarur për realizimin e zgjedhjeve të lira dhe të ndershme.
