Peshëngritësi Briken Calja arriti një rezultat historik ditën e sotme në Lojërat Olimpike “Tokyo 2020”, duke u renditur në vendin e katërt, vetëm 1 kilogramë larg medaljes së bronzit. Calja ngriti plot 190 kilogramë në provën e tretë të stilit të shtytjes, duke qenë shumë afër podiumit.
Pas garës ai ka folur për median kosovare “Koha ditore”, ku është shprehur se është jashtëzakonisht i kënaqëur me rezultatin, që është edhe më i miri i arritur ndonjëherë për sportin shqiptar në një Olimpiadë. Ai falenderoi familjen e tij dhe Zotin që gjithçka ka shkuar shumë, ndërsa theksoi edhe një herë se është i lumtur me rezultatin.
‘’Me rezultatin jam jashtëzakonisht i kënaqur. Mos të harrojmë se në shtytje dola i treti, një rezultat fantastik. Rezultati më i mirë i sportit shqiptar në histori shqiptare. Mos të harrojmë se unë kam zënë vendin e gjashtë në Londër, të pestin në Rio. Isha vetëm një vend larg medaljes, por ky është sporti. Është rezultat historik. Dua të falënderoj familjen time jashtëzakonisht shumë, për shkak se kemi kaluar një situatë jo të mirë. Falënderoj Zotin që ka dal mirë gjithçka. Duhet të jemi të lumtur për rezultatin, është rezultat historik dhe jam shumë i lumtur”, ka thënë Calja.
