Kryeministri Edi Rama i ftuar në ‘ Zonë e Lirë’ , i është përgjigjur presidentit Ilir Meta, i cili shprehej ndër të tjera se Gent Cakaj kishte marrë brenda 24 orësh certifikatën e sigurisë.
Rama nga ana tjetër tha se Meta si kryetar Kuvendi e ka marrë brenda disa orësh certifikatën e sigurisë për një aktivitet ku duhej të shkonte.
Kreu i qeverisë shtoi se edhe ish-ministrja e LSI, Klajda Gjosha si dhe ish ministri Edmond Panariti kanë punuar pa certifikatë sigurie.
“Meta si kryetar kuvendi e ka marrë brenda disa orësh certifikatën e sigurisë për një aktivitet ku duhej të shkonte, se certifikata e sigurisë është një dokument që i jepet një individi që duhet të vihen në posedim të një dokumentacioni të klasifikuar. Meta është në shkelje të plotë të etikës, ligjit, që e ndalon presidentin të ketë opinione të cilat përcaktojnë nëse dekreton ose jo një ministër.
Dua të kujtoj një fakt, n.q.s. ka pasur një moment konflikti dhëmb për dhëmb politik mes Metës dhe një ministri të propozuar nga kryeministri, ka qenë ai mes Bujar Nishanit dhe Xhafës. Pse Meta po sfidon kushtetutën? Për 3 vite Klajda Gjosha ka qenë pa certifikatë sigurie. Edhe Edmond Panariti ka qenë pa certifikatën e sigurisë kur ishte ministër i Jashtëm.”- tha Rama.
