Detaje të reja kanë dalë në lidhje me vdekjen e 33-vjeçarit Branko Shkoza në Durrës, i cili u gjet i vdekur në një kanal në Spitallë.
Në një intervistë për emisionin “Me zemër të hapur” në News24, bashkëshortja e viktimës, Bora Shkoza, tha se burri i saj kishte shkuar të pinte kafe dhe i kishte thënë se do të kthehej shpejt, por nuk u kthye.
Ajo hedh poshtë akuzat se Branko i kishte ngacmuar gruan e autorit, duke theksuar se burri i saj ishte shpesh nën efektin e alkoolit, por nuk kishte ngacmuar askënd.
Bora gjithashtu përmendi se ndoshta Branko mund ta ketë sharë autorin për shkak të gruas së tij, por se ai dhe Habibi ishin shokë të ngushtë. Sipas saj, autori ka goditur Brankon, ndërkohë që të dy ishin nën efektin e alkoolit, dhe pas goditjes, viktima ka rënë në kanal, ku ka humbur jetën.
Autori ka fshehur ngjarjen dhe ka shkuar në varrimin e shokut. Pas disa ditësh, trupi i Brankos u gjet dhe fillimisht ngjarja u raportua si aksidentale. Majlind Habibi është arrestuar dhe ka shfaqur shenja pendese për veprën e tij.
“Kam djalin 11 vjeç me Brako Shkozën. Burri më tha se do dal të pi një kafe e do vij prapë. M’u lut që të pinim kafe e nuk shkova. Pas disa ditësh, vjehrra më tha se Branko është në kanal. Pasi burri m’u zhduk disa ditë, te puna u sëmura, kisha parandjenja, e doja shumë. Kur u vonua tre ditë, thashë diçka i ka ndodhur. I thosha mos pi, por nuk merrte vesh.
Burri im rrinte gjithmonë tapë. Autorin mund ta ketë sharë nga gruaja, ishte pak i pistë nga goja, por ai nuk ngacmon. Burri im dhe autori ishin shokë të ngushtë. Nuk flisja asnjëherë me shokët e burrit, me gruan e autorit i flisja si je si kalon, kaq. Unë jam te mami im tani, djali im vjen dhe këtu e shkon edhe tek gjyshërit. Nuk rri dot pa burrin. Burrin e kam mbajtur unë, se vetë pinte shumë. I prishte lekët me raki. Unë mendoj se autori e ka vrarë, sepse besoj se Branko e ka sharë atë. Bashkëshorti kishte pak gojë, por ishte i dashur. Edhe më ka dhunuar, qoftë dhe para syve të djalit. Të dy pinim bashkë në lokal dhe janë zënë atje, jo kush jam e kush je ti,” tha ajo.
