Teksa situata nga koronavirusi në vendin tonë duket nën kontroll, kryeministri Edi Rama ka lajmëruar prej ditësh lehtësimin e masave të marra për parandalimin e COVID-19.
Së fundmi, me anë të një statusi në Facebook, Rama ka lajmëruar ndryshime në Kodin Penal dhe Rrugor të Republikës së Shqipërisë, madje tha se po përgatitet t’i drejtohet Parlamentit, për këtë gjë.
Kryeministri shkruan se heqja e lejes së drejtimit të automjetit për disa vite dhe heqja e lirisë për këmbësorët që shkelin karantinën, do të kthehen në norma bindëse për të siguruar fitoren e luftës.
Kreu i qeverisë lajmëron se brenda datës 15 prill do të ketë masa lehtësuese për mënyrën e lëvizjes në vazhdim, ndërkohë që shton se brenda të njëjtin afat, pritet edhe zgjerimi i paketës financiare.
“Masat e reja shtrënguese, për të cilat po përgatitemi t’i drejtohemi parlamentit për ndryshime në kodin penal & rrugor të republikës së shqipërisë, në kushtet e gjendjes së fatkeqësisë natyrore dhe specifikisht epidemisë, nga njëra anë do të mbrojnë popullin nga të pabindurit deri në fund të kësaj lufte, nga ana tjetër do të garantojnë lehtësimet e nevojshme në vazhdim, duke siguruar shëndetin e çdo qytetari.Heqja e lejes së drejtimit të automjetit për disa vjet, e po ashtu heqja e lirisë, për disa apo shumë vite sipas shkallës së shkeljes, do të kthehen në norma bindëse për të siguruar fitoren e luftës pa rrezikuar arritjet e derisotme dhe rrugën e rimëkëmbjes ekonomike pa cënuar shëndetin e askujt. Brenda 15 prillit do të kemi paketën e zgjeruar financiare dhe gatishmërinë për miratimin e masave. Lehtësuese në qeveri, si edhe të masave të reja penale në kuvendin e shqipërisë,“- shkruan kryeministri.
Shqipëria ndodhet në izolim total prej një muaji për shkak të situatës së krjuar nga COVID-19.
Lëvizjet për pazare dhe nevoja të përditshme janë kufizuar në daljen e një personi të vetëm për çdo familje, me lejen përkatëse.
Deri tani janë shënuar 22 viktima dhe 400 të infektuar.
