Një gjykatë vietnameze dënoi pesë gazetarë me burgim dhe i ndaloi ata të punojnë për tre vjet, njoftoi media shtetërore, pasi ata u dënuan për përhapjen e përmbajtjes antishtetërore në një media me bazë në Facebook.
Ata u shpallën fajtorë për “abuzim të të drejtave dhe lirive demokratike për të cenuar interesat e shtetit” në një gjyq dyditor në qytetin jugor Can Tho, tha të enjten Agjencia shtetërore e lajmeve e Vietnamit (VNA).
Gazetarët krijuan një gazetë të quajtur Bao Sach (Gazeta e pastër) në Facebook, e cila, sipas aktakuzës së cituar nga VNA, kishte përmbajtje që shtrembëronte informacionin dhe shpifte qeverinë.
“Veprat e kryera nga të pandehurit gjithashtu shkaktuan konfuzion, dyshim në mesin e njerëzve”, thuhej ne akakuzë
Autoritetet në Vietnam ndalojnë rregullisht përdoruesit e mediave sociale për postimin e përmbajtjes “anti-shtetërore”. Truong Chau Huu Danh, një ish-reporter dhe udhëheqës i grupit, u dënua me katër vjet e gjysmë burg, ndërsa të pandehurit e tjerë u dënuan me burgim nga dy deri në tre vjet, tha VNA. Të pestë do të ndalohen nga gazetaria për tre vjet pasi të dalin nga burgu, raportoi VNA.
Zëvendësdrejtori i Azisë për “Human Rights Watch” me bazë në Nju Jork, Phil Robertson tha se Vietnami nuk duhet t’i trajtojë mediat si “armiq të shtetit”.
“Burgosja e më shumë gazetarëve nuk do t’i ndalojë njerëzit të ankohen ose të kërkojnë reforma në Vietnam. Qeveria duhet të pranojë se gazetarët dhe mediat e pavarura janë aleatë të qeverisjes së mire”, tha Robertson.
