Reshjet e dendura të shiut në ditët e fundit kanë shtuar sasinë e prurjeve të lumenjve në vend dhe kjo ka shtuar rrezikun e përmbytjeve.
Kjo ka sjellë edhe reagimin e Ministrit të Mbrojtjes, Niko Peleshi, në një dalje për mediat ka bërë publike të dhënat në lidhje me gjendjen në vend. Ai theksoi se ka patur rrëshqitje dherash në shumë akse dhe kjo ka bërë që të ketë probleme të shtuara në disa rrugë.
Për ministrin, situata mbetet më kritike në Shkodër, ku lumi Buna ka dalë nga shtrati dhe për pasojë ka përmbytur 270 hektarë tokë. Peleshi tha më tej se strukturat shtetërore janë në gatishmëri për të ndërhyrë në çdo rast nevoje.
“Situata e shkaktuara nga reshjet ka paraqitur probleme nga veriu në jug, por jo të përmasave shqetësuese. Sa i përket situatës në veri, ka pasur probleme në infrastrukturën rrugore, ku ka pasur rrëshqitje dherash. Në të gjithë akset ku ka pasur probleme po punohet. Furnizimi me energjike ka pasur probleme për shkak të erërave të forta, por edhe për këtë po punohet. Kuotat e lumenjve deri në këto momente nuk paraqesin rrezik për përmbytje edhe pse ka pasur rritje të kuotave. Në Shkodër, ka dalë lumi Buna duke përmbytur 270 hektarë tokë. Të merren masa, paralajmërim i popullatës, ku parashikohet rrezik, evakuim dhe strehim në raste nevoje. Prioritet në këtë vit, por edhe në vazhdim duhet të jetë investimi në ujëmbledhës. Për menaxhimin e çdo lloj situate, janë në gatishmëri 1200 forca dhe 450 mjete, shërbimi zjarrfikës ka 1203 forca dhe 159 mjete, 113 ambulanca dhe personel, policia 200 forca, struktura vullnetare 115 persona, si edhe mjetet ajrore 3 helikopterë”, tha Peleshi.
