Ministri i Mbrojtjes së Kosovës, Ejup Maqedonci, ka deklaruar se Bullgaria është e gatshme t’i bashkohet marrëveshjes ushtarake të nënshkruar ndërmjet Kosovës, Shqipërisë dhe Kroacisë. Deklarata u bë gjatë një interviste për TRT Balkan, në kuadër të Forumit Diplomatik të Antalyas.
“Kemi një konfirmim nga Bullgaria, e cila ka diskutuar më herët me ministrin kroat për mundësinë që t’i bashkëngjitet kësaj marrëveshjeje trilaterale,” tha Maqedonci, duke shtuar se pret që edhe vende të tjera të rajonit t’i bashkohen kësaj nisme.
Ministri theksoi se aleanca synon forcimin e bashkëpunimit për paqen, sigurinë dhe stabilitetin rajonal.
“Besoj plotësisht që edhe vende të tjera të rajonit, sidomos ato që ndajnë vlerat e përbashkëta me ne dhe që ndajnë normalisht edhe interesa të përbashkëta, sepse nuk mjaftojnë vetëm vlerat, do të bashkëngjiten në këtë marrëveshje, le të themi në këtë deklaratë, e cila, edhe njëherë po e theksoj, gjithmonë synim ka paqen, stabilitetin dhe sigurinë,” u shpreh ai.
Në intervistën që pritet të publikohet së shpejti, Maqedonci flet gjithashtu për gjendjen e sigurisë në Kosovë dhe rajon, marrëdhëniet me Turqinë dhe zhvillime të tjera aktuale në fushën e mbrojtjes.
