Fermerët e Lushnjës, por jo vetëm kanë protestuar sot para parlamentit kundër paketës fiskale. Ata iu kanë bërë thirrje 140 deputetëve t’i mbështesin pasi janë në prag falimentimi.
Apeli i një nga fermerëve ishte dëshpërues, ai thotë se deri më tani janë diskriminuar dhe se bujqësia nuk njeh parti.
Fermeri thotë se e ka faturën me vete ku një kg manderina e ka shitur 300 lekë të vjetra dhe bën krahasimin me çmimin që shitet në kryeqytet.
“Kemi qenë si fëmija i njerkës. Po vete 70 vjeç, kam 2 ha mandarina të mbjella. Po falimentojmë, nuk po hedhim dot. Bima është si fëmija, po nuk hëngri nuk bën cilësi që ta hash ti, duhet ta hedh në kanal. Ne kërkojmë, as nga PD, as nga PS, të 140 deputetët duhet të na mbështesin, lëre partinë. Bujqësia nuk njeh parti. Bujqësia sjell prodhim për të gjithë. E kam faturën këtu. E kam shitur me 300 lekë mandarinën, këtu shitet 1000 lekë. Shteti thotë tregti e lirë, nuk ka tregti kështu. Nuk ushqehemi dot kështu. Ne po flasim për të mbijetuar. Thonë disa, ai qenka veshur mirë, po pse unë nuk kam të drejtë të jetoj, vetëm ti paske të drejtë të jetosh, ti që je në Tiranë?! Ata fëmijët e mi nuk kanë të drejtë të gëzojnë një drekë, një darkë nga unë?! Nuk po kërkojmë lustra. Më shumë kanë ardhur policë, ne nuk kemi ardhur për luftë siç vijnë partitë. Nuk kam ide partish fare. Por ama të drejtat i duam dhe ne. Kam bërë shtëpinë, më ikin kalamajtë, ç’i dua shtëpitë unë. Këtu e kemi të keqen, nuk ka problem se është i PS apo i PD”, tha fermeri.
