Një person i dyshuar për atentatin ndaj prokurorit Arjan Ndoja dhe Landi Muharremit, është shoqëruar nga policia.
‘Dosja.al’ shkruan, se i shoqëruari është nga Fushë-Kruja, por nuk ka të dhëna për identitetin e tij.
Ai dyshohet të jetë njëri nga personat që ka qëlluar mbi automjetin e prokurorit të Durrësit.
Që nga dita kur ndodhi atentati, policia ka shoqëruar 30 persona, të cilët mund të kishin informacione për ngjarjen.
Prokurori Arjan Ndoja dhe Landi Muharremi, i njohur ndryshe si ‘i forti’ i Sukthit, u qëlluan me breshëri kallashnikovi te mbikalimi i Shkozetit, pasditen e së premtes.
Si pasojë e të shtënave u plagosën të tre personat që ndodheshin në mjet.
Ndoja dhe Muharremi janë jashtë rrezikut për jetë, ndërsa shoferi Andi Maloku ndodhet në gjendje të rëndë.
Pak orë pas ngjarjes policia gjeti një mjet të braktisur, brenda të cilit ndodheshin dy maska, dy kallashnikovë dhe një shishe me benzinë.
Kjo dosje i ka kaluar prokurorit të Krimeve të Rënda, Anton Martinit.
