Një breshëri plumbash janë qëlluar mëngjesin e sotëm drejt një lokali në Lezhë.
Ngjarja ka ndodhur në orën 06.30 të mëngjesit, ndërsa paraprakisht nuk raportohet për persona të lënduar por vetëm për dëme materiale. Lokali në drejtim të të cilit u qëllua me breshëri arme zjarri është në pronësi të shtetasit Gjovalin Prendi.
Sipas burimeve zyrtare, ngjarja ndodhi në fshatin Pllanë, Lezhë në rrethana ende të paqarta.
Nga verifikimet paraprake të bëra nga shërbimet e Policisë, nuk ka persona të dëmtuar. Në vendin e ngjarjes ndodhen shërbimet e Policisë dhe grupi hetimor për sqarimin e rrethanave të ngjarjes
Janë ngritur pika kontrolli në aksin rrugor dhe vijon krehja e zonës nga shërbimet e Policisë të DVP Lezhë.
Qysh nga muaji prilli, Lezha nuk ka shënuar ngjarje të rënda. Në atë kohë u shënua një krim i rëndë për motive pronësie. Aleksander Perdoda, autori i një vrasje të dyfishtë, ka pranuar krimin. Kol Murrani, rapsod i njohur në zonë dhe Preng Simoni u vranë më 27 prill në mesditë dhe trupat e tyre u gjetën pa shenja jete.
Si motiv për ngjarjen kishte qenë një konflikt pronësie për një toke are në fshatin Lalm. Nisur nga këto të dhëna ishte shpallur në kërkim si i dyshuar për ngjarjen 41-vjeçari Aleksandër Përdoda, banor i fshatit Lalm, i cili tashmë është arrestuar.
/Gazetareforma.com/
