Në një intervistë për emisionin “Kafe Shqeto”, drejtori i Qendrës Kombëtare të Urgjencës Mjekësore, Skënder Brataj, ka ngritur shqetësime serioze për sfidat me të cilat përballet sistemi shëndetësor, veçanërisht në sezonin e verës, kur rritet ndjeshëm fluksi i rasteve urgjente.
Sipas Bratajt, edhe pse stafet mjekësore japin maksimumin në terren, problemet strukturore si mungesa e financimeve dhe vonesat sistematike vazhdojnë të pengojnë reagimin efektiv në situata emergjente.
Ai theksoi se pa mbështetje të mjaftueshme buxhetore dhe një planifikim strategjik afatgjatë, sistemi i urgjencës rrezikon të ngelet i pafuqishëm përballë kërkesave në rritje.
“Nuk mund të luftojmë me mullinjtë e erës pa burime të mjaftueshme financiare,” tha Brataj, duke nënvizuar se çdo reformë në shëndetësi do të mbetet iluzion nëse nuk mbështetet me investime reale dhe struktura të qëndrueshme.
Ai bëri apel për ndërhyrje të menjëhershme dhe rishikim të prioriteteve në sektorin e urgjencës.
“Një gjë dua të them, duhen dëgjuar specialistët dhe teknikët. Më parë duhet dëgjuar teknikët, pastaj të merret vendimi politik, jo e kundërta.Nuk mund të luftojmë dot me mullinjtë e erës, sado në çdo rast e bëjmë dhe fatmirësisht ka një lloj matjeje.Çfarë do lloji gjëje që të thuhet, është një mekanizëm që nuk e ndryshon dot, qoftë regjistrimi i thirrjes, nisja e ambulancës, mbërritja në vend, sa ka ecur etj.Kështu që edhe ai rast i fundit ishte 22 minuta, por në këtë periudhë ka shumë incidente, shërbime misione spesialiste, shtohen llojet e patologjive sipas stinës, shtohet numri dhe këtë e dimë shumë mirë.Shumë herë kur diskutoj edhe me këto grupet e ‘Task Forcës’, do bëhet kjo apo do bëhet ajo, por ore, a ka një buxhet për këtë që do bëhet? Sepse me fjalë është shumë kollaj, është shumë e thjeshtë dhe duke parë që çdo vit numri shtohet, fatmirësisht mbahet parasysh se nëse si institucion mua më jep një buxhet për 3 milion shqiptarë, po për ata 11 që vijnë, me ç’do i përballosh?Kështu që mundësia e rritjes financiare (jo aq sa duhet) bëhet në mënyrë të tillë që të përballosh dhe kjo mënyrë e qendrës shëndetësore verore, fatmirësisht jam një nga iniciatorët që kur kam ardhur, më pyesin, ore si i bëhet sepse spostohet shërbimi kur shkon qytetari.Sepse qytetari nëse shkon në plazh, po erdhi deri në Tiranë nuk kthehet më, po shkoj në Dhermi dhe shkoj deri në spitalin e Vlorës, as aty nuk kthehet më.Flas këtu për ato gjëra të vogla se sigurisht po të ketë ndonjë sëmundje që ka evolucionin e vet, sigurisht që do i mbyllë pushimet”, u shpreh Brataj.
