Rënia e numrit të nxënësve dhe përkeqësimi i cilësisë së arsimit janë probleme që po thellohen çdo vit në Shqipëri, duke shkaktuar pasoja të rënda për të ardhmen e brezave të rinj.
Emigracioni masiv ka çuar në braktisjen e shkollave, duke lënë shumë institucione arsimore me një numër të ulët nxënësish.
Një nga ngjarjet më të trishta që ka nxjerrë në pah dështimin e sistemit arsimor është vrasja e Martin Canit, një ngjarje tragjike që thekson seriozitetin e problemeve të sigurisë në shkolla.
Përveç problemeve të sigurisë dhe infrastrukturore, një tjetër shqetësim është përdorimi i hapësirave të mbyllura shkollore për aktivitete të paligjshme, ku trafikantët të lidhur me qeverinë kanë vendosur t’i kthejnë shkollat e braktisura në “shtëpi bari”.
Ky fenomen tregon se dështimet e sistemit arsimor po shoqërohen me rritje të aktiviteteve kriminale dhe mungesë të kontrollit të shtetit.
Një operacion tjeter policor zbuloi një rast të kultivimit të kanabisit në një ndërtesë publike të braktisur prej vitesh, në fshatin Dush, Vau i Dejës.
Gjatë kontrollit, një nga ambientet e kësaj godine ishte përshtatur për kultivimin e bimëve narkotike me anë të llambave, një metodë profesionale e përdorur nga kultivuesit. Në këtë ambient u gjetën 578 fidanë të dyshuar si cannabis sativa, të mbjellë në kubikë dhe vazo, si dhe 103 llamba elektrike dhe pajisje të tjera që shërbenin për zhvillimin e bimëve.
Policia arrestoi në flagrancë shtetasin F. M., 62 vjeç, banues në Laç dhe elektricist i zonës, ndërsa procedoi penalisht tre të tjerë në gjendje të lirë: J. D., 41 vjeç, banues në Fushë-Arrëz; I. M., 32 vjeç, banues në Shkodër; dhe A. B., 32 vjeç, banues në fshatin Hajmel. Të tre janë pjesë e grupit të punës së OSHEE-së që mbulon zonën dhe akuzohen për veprat penale “Shpërdorim i detyrës”, “Kultivimi i bimëve narkotike” dhe “Vjedhja e energjisë elektrike”.
Autoritetet nën drejtimin e Prokurorisë po vijojnë hetimet për identifikimin dhe kapjen e të gjithë personave të përfshirë në këtë aktivitet kriminal. Materialet e rastit i janë referuar Prokurorisë për veprime të mëtejshme.
Ky rast tregon sesi godinat publike të braktisura, që dikur ishin pjesë e infrastrukturës shtetërore, po shfrytëzohen për aktivitete kriminale, duke nxjerrë në pah nevojën për më shumë kontrolle dhe përgjegjshmëri institucionale.
