Deputeti socialist Erion Braçe ka vijuar fushatën e tij publike në mbrojtje të shëndetit të fëmijëve, duke denoncuar këtë herë atë që e cilëson si skandal me cigaret IQOS.
Përmes një videoje të publikuar në rrjetet sociale, Braçe tregon se brenda cigares elektronike ndodhet një fletë metalike, duke ngritur shqetësime serioze mbi pasojat që ky produkt mund të ketë për shëndetin, veçanërisht tek të miturit. Ai thekson se, ndonëse ligji ndalon shitjen e duhanit elektronik për fëmijët dhe ndalon reklamimin e tij, këto produkte sipas tij vazhdojnë të qarkullojnë lirshëm.
Braçe akuzon drejtpërdrejt kompaninë Philip Morris, prodhuese e IQOS, duke deklaruar se interesi financiar prevalon mbi çdo shqetësim shëndetësor dhe ligjor. Deputeti kërkon ndërhyrjen e institucioneve shtetërore për zbatimin e ligjit dhe mbrojtjen e fëmijëve.
Postimi i plotë i Erion Braçes:
“ALARMI PER FEMIJET;
BRENDA DUHANIT ELEKTRONIK!
JA CFARE KA!
Dhe ky ju shitet femijeve!
U shpik e shitet per teknologji, luks, ‘me pak i demshem’, nderkohe qe krijon varesi te qarte dhe demton pafund mushkerite;
Vecanerisht te FEMIJEVE!
E kemi ndaluar me ligj tu shitet femijeve, kemi ndaluar reklamen per te kudo, por paraja e madhe e PHILIP MORRIS nuk pyet, po fare fare fare!!”
Denoncimi i Braçes vjen mes debateve në rritje mbi ndikimin e produkteve të reja të duhanit tek të rinjtë dhe efektivitetin e kontrollit shtetëror mbi tregtimin e tyre.
