Për grabitjen e ndodhur ditën e djeshme në Rinas kanë reaguar shumë figura dhe mëngjesin e sotëm ka qenë pikërisht zëvendës kryeministri Erion Braçe ai që ka folur për ngjarjen. Braçe ka thënë se policia ka gjithë mbështetjen e qeverisë dhe e vlerëson punën e bërë deri tani.
Sipas zv/kryeministrit përballja e djeshme ka qenë shumë e rëndësishme dhe e madhe pasi policia është bërballur me një nga bandat më të rrezikshme, por fatmirësisht është bërë e mundur që kreu i bandës të eliminohet dhe të identifikohen të gjithë pjesëtarët në grabitje.
“Gjithë mbështetjen për Policinë e Shtetit, burrat që u përballën dje me një nga bandat më të rrezikshme në vend dhe eliminuan drejtuesin e saj. Burrat që po hetojnë intensivisht dhe që kanë identifikuar çdo grabitës të përfshirë, burrat që janë në territor dhe vazhdojnë ndjekjen”,- thotë Braçe në një status të shpërndarë në rrjetet sociale.
Sipas Braçes, tashmë prioriteti kryesor mbetet identifikimi dhe kapja e bandave.
“ Ndaj mbështetje për çdo oficer të policisë të përfshirë në hetime e operacionin e pandërprerë në terren! Pas kësaj, padiskutim analizë e plotë e çdo elementi që ka cënuar rëndë sigurinë nga bankat në aeroport, masa të forta për çdokënd!”, ka thënë zëvendës kryeministri.
