Dritan Rexhepi u paraqit sot para trupës gjyqësore të Gjykatës së Posaçme për t’u njohur me masën e sigurisë.
Gjyqtarët zhvilluan dy seanca për të, një me dyer të mbyllura, ku u vendos masa e arrestit me burg, dhe një tjetër që përfshinte shtatë të akuzuar, përfshirë Gentian Funiqin (ende i pa ekstraduar nga Spanja). Seanca e fundit u shty për mungesë të avokatit mbrojtës të Korado Geshtejës.
Në këtë proces gjyqësor, të akuzuar janë Aldo Majnishta, Artan Doçaj, Dritan Rexhepi, Gentian Funiqi, Geraldo Martini, Korado Geshteja dhe Martin Bleta.
SPAK ka akuzuar Rexhepin dhe Funiqin për organizimin e rrëmbimit të Jan Prengës, pas dyshimeve se vëllai i tij në Angli kishte vjedhur 260 kg kokainë që dyshohej se iu përkisnin atyre.
Rexhepi, i njohur si “bosi” i drogës dhe ekspert i arratisjeve nga burgjet, ka një histori të gjatë me drejtësinë, duke mbajtur mbi 40 vite dënim në total dhe akuzohet si porositës i rrëmbimit dhe zhdukjes së Jan Prengës në vitin 2020.
