Shërbimet lokale të trenit dhe linja ndërkombëtare Eurostar janë ndërprerë në stacionin Gare du Nord në Paris, pasi një bombë e pashpërthyer nga Lufta e Dytë Botërore u zbulua në afërsi të tij.
Sipas mediave të huaja, pajisja shpërthyese u gjet mes shinave në zonën e Saint-Denis, në periferi të kryeqytetit francez, gjatë punimeve të natës në infrastrukturën hekurudhore.
Gare du Nord, stacioni më i ngarkuar i Francës, është nën masa të rrepta sigurie, ndërsa policia dhe ekipet e specializuara po punojnë për çaktivizimin e bombës.
Si pasojë, tre trena të Eurostar të planifikuar për të premten në mëngjes janë anuluar, ndërsa autoritetet hekurudhore po ndjekin situatën.
Nuk është e pazakontë që bomba të pashpërthyera të kohës së luftës të zbulohen në këto zona, pasi bombarduesit britanikë dhe amerikanë kishin në shënjestër kantieret hekurudhore të Parisit dhe qyteteve të tjera për të penguar strategjinë gjermane të luftës.
Kohëzgjatja e operacionit të çmontimit varet nga madhësia dhe pozicioni i bombës, ndërsa pastrimi i zonës mbetet prioritet për autoritetet.
