Mbrëmjen e djeshme rrugët e qytetit të Beratit kanë qenë të blinduara nga Policia Rrugore.
Ky aksioni policor, është zhvilluar në pikat kyçe të qytetit dhe në hyrje-daljet e tij, ku ka si qëllim kapjen e personave në kërkim, uljen e kriminalitetit dhe rritjen e sigurisë rrugore.
Ky operacion ka angazhuar forca të shumta policore, duke filluar që nga inspektorët e krimeve, forcat Shqiponja e deri tek ata të qarkullimit rrugor.
Çdo makinë që është ndaluar është kontrolluar imtësisht për drogë dhe për armë, ndërkohë që janë kontrolluar edhe personat që drejtonin automjetet, nëpërmjet identitetit të tyre, për të verifikuar nëse janë apo jo persona në kërkim policor në Berat apo në qytete të tjera.
Burimet zyrtare të policies Berat njoftojnë se vetëm në 3 orët e para të këtij aksioni janë kontrolluar rreth 120 automjete dhe janë vendosur edhe masa administrative për ata drejtues mjetesh që kanë rezultuar me mangësi në dokumentacion dhe me shkelje.
Gjatë këtij aksioni, policia ka ushtruar kontroll fizik për armë, drogë e sende të tjera të paligjshme mbi 155 shtetas që kanë kaluar me automjete në postblloqet e ngritura.
Mësohet se postblloqet policore do të vijojnë të qëndrojnë disa ditë me radhë në rrugët e qarkut të Beratit, ndërkohë që policia e Beratit do të japë së shpejti edhe rezultatet e aksionit.
