Konfindustria kundërshton në mënyrë të qartë cdo rikthim të gjëndjes së karantinës për bizneset dhe qytëtarët si masë kundër Covid 19. “Konfindustria vlerëson, se rikthimi i mbylljes për ekonominë dhe lëvizjen e qytetarëve do të conte në mënyrë të pashmangshme në falimentim të sigurtë të shumë kategorive të bizneseve të mëdhenj, të mesëm dhe të vegjël, duke rritur ndjeshëm papunësinë dhe rënien e nivelit të mirëqënies. Vlerësohet, se sidomos falimentimi do të ishte i pakthyeshëm për një shumicë të industrive vendore. Sa më sipër do të rrezikonte seriozisht kapjen e mëtejshme kërcënuese të tregjeve vendore nga prodhimet dhe shërbimet e huaja konkurente me pasoja të pallogaritshme në afatgjatë për zhvillimin ekonomik dhe mirëqënien e qytetarëve shqiptarë”.
Sipas Konfindustrisë, pasojat ekonomike rrjedhuese do të ishin aq të rënda për mbijetesën e qytetarëve shqiptarë, sa mund të prodhojnë deri në përballje me prishje të paqes sociale dhe rendit kushtetues.
Konfindustria vlerëson, se ekonomia shqiptare pësoi një goditje mjaft të ashpër si pasojë e mbylljes kundër pandemi në 6 mujorin e parë të vitit 2020. Rënia ekonomike parashikohet të jetë deri në 12.5 % të PBB për vitin financiar në vazhdim. Vetëm në 3 muaj mars-maj 2020 humbjet në ekonomi përllogariten në mbi 2 miliard $.
