“E kam blerë kimioterapinë në farmaci jashtë spitalit,” tregon mes lotësh nëna e të ndjerit Florenc Muka. “Herceptina kontrabandë kushton 800 euro me referencë mjeku, 600 pa të,” konfirmon gazetari investigativ Osman Stafa. Është formula e thjeshtë e një biznesi makabër: ilaçet “mungojnë” në spital por shfaqen mrekullisht në farmacitë përreth.
Në grupet e WhatsApp-it, mjekët e kapur në këtë skemë shkëmbejnë emoji qesharake: “Nga 10 pacientë, 9 do i çojmë në varreza.” Përgjegjësi i njësisë jep udhëzimin cinik: “Edhe kur të mbarojnë ilaçet, qetësia e korridorit dhe fjala e mjekut do të jenë trajtimi më i mirë.”
Është një sistem i projektuar për të nxjerrë para nga vuajtja. 43 medikamente kimioterapie “mungojnë” prej 5 vitesh në spital. Aparaturat “prishen” pa u riparuar kurrë. 60% e shpenzimeve dalin nga xhepat e pacientëve që luftojnë me vdekjen.
“Kam që në janar… dua të di a ka vajtur sëmundja në kockë?” pyet Drita Haxhillari, 20 vjet luftë me kancerin. Por sistemi ka vetëm një përgjigje: “Blej jashtë.”
Kryeministri Rama kalon si turist pranë Onkologjikut, qan në podcast për “situatën prekëse”, por rrëzon propozimin për 15 milionë euro shtesë për ilaçe. Është i njëjti skenar si me dializën – krijohet artificialisht kriza për të justifikuar privatizimin që do vijë.
“Ka pasur raste që i kam bërë edhe ujë me sheqer një djali që luftonte me jetën,” thotë nëna e Florencit. Është dëshmia më e hidhur e një sistemi ku edhe shpresa është kthyer në mall.
Kontrolli i Lartë i Shtetit ka zbuluar se për tre vjet, mbi 600 paciente femra nuk janë trajtuar për tumoret gjinekologjike. Aparatura e brakiterapisë ka qenë jashtë funksionit për shkak të mungesës së burimit radioaktiv Iridium 192. QSUT dhe Ministria e Shëndetësisë janë vënë në dijeni, por nuk kanë vepruar. Për më tepër, mungesa e një regjistri elektronik për pacientët me tumor ka hapur rrugën për abuzime masive me barnat që duhet të jepeshin falas nga shteti.
Shifrat flasin vetë: Vetëm 2.78% e buxhetit 2024 shkon për shëndetësinë – më e ulëta në Evropë. 60% e shpenzimeve dalin nga xhepat e qytetarëve. Dhe kur PD propozoi 15 milionë euro shtesë për ilaçe në Onkologjik, mazhoranca e rrëzoi pa diskutim.
“Nuk kemi të bëjmë vetëm me një sistem të keqfinancuar, por me një sistem shumë të korruptuar”, thotë organizata “Together for Life”. Por heshtja e pushtetit është më vrasëse se vetë korrupsioni.
Në korridoret e Onkologjikut, vdekja nuk vjen më vetëm nga kanceri – vjen nga një sistem që ka vendosur të vrasë dy herë: një herë me sëmundje dhe një herë me braktisje të organizuar.
/gazetareforma.com
