BIRN i ka dedikuar një artikull të gjatë kujdesit shëndetësor, ushqimeve, qirave dhe çmimeve të larta në vendin tonë, duke e bërë akoma dhe më të qartë panoramën e sotme të gjendjes ekonomike në Shqipëri.
Sipas BIRN, Banka e Shqipërisë rriti në mënyrë të befasishme normën bazë të interesit javën e kaluar në 3.25%. Kjo lëvizje vjen nga nevoja për të rritur normën bazë të interesit deri në 4 apo 4.5% me qëllim luftën kundër inflacionit. Ndërsa, sa i përket çmimeve të ushqimeve mësohet se janë rritur më shumë, ndërkohë që kërkesa për konsum nuk është shtuar.
“Indeksi i përgjithshëm u rrit me 3.8% në shtator, grupi ‘Ushqime dhe Pije Joalkoolike’ u rrit me 7.4%. Ritmi shumë i fortë i rritjes së grupit të ushqimeve prek veçanërisht ashpër familjet e varfra, konsumi i të cilave është i përqendruar te ushqimet në masë më të madhe se sa për popullsinë në përgjithësi. Por rritja e çmimeve të mallrave të domosdoshme dhe rritja e ngadaltë e mallrave dhe shërbimeve të tjera vë në dukje edhe karakterin e inflacionit, si të tillë të ushqyer nga oferta me çmime të larta dhe jo nga kërkesa e shtuar”, thekson BIRN.
Mësohet se që nga viti 2021, çmimet në Shqipëri janë rritur me 15.4% ndërsa çmimet e grupit “Ushqime dhe Pije Joalkoolike” janë rritur me 29%.
Gjithashtu, rritje ka pësuar edhe kujdesi shëndetësor me 3% më shumë se sa dy vjet e gjysmë më parë, ndërsa shërbimi arsimor është shtrenjtuar me vetëm 5%.
BIRN shprehet se shqipëtarët sot harxhojnë 36% të parave për ushqime dhe pije joalkoolike dhe 20% për qiranë, ujin, lëndën djegëse dhe energji elektrike për konsum familjar.
