Në seancën e sotme gjyqësore për të arrestuarit për skandalin e biletave të falsifikuara të autobusit, Prokuroria e Tiranës ka kërkuar masën “arrest me burg” për 7 nga 8 të arrestuarit.
Konkretisht organi i akuzës ka kërkuar masën e arrestit për Ferdinand Ibrahimin dhe djalin e tij Anastas Ibrahimit të cilit iu gjetën biletat e falsifikuara në bagazhin e makinës, si edhe për të arrestuarit Fatos Vrapi, Erisa Vora, Klodiana Qato, Aldi Duka si edhe Lulzim Allaraj.
Ndërsa për Albana Vrapin, bashkëshorten e Fatos Vrapit dhe bashkëadministratoren e “Alba Trans”, Prokuroria ka kërkuar masën e detyrimit me paraqitje.
Gjatë senacës së sotme, Ferdinand Ibrahimi ka mohuar akuzat e ngritura ndaj tij. Ai është shprehur se nuk kishte dijeni për biletat e falsifikuara dhe se biletat e gjetura në bagazhin e makinës së të birit, ishin të vjetra.
Sakaq ditën e stome është zbuluar se pak para arrestimit, Ibrahimi kishte udhëzuar në telefon të birin që të digjte dokumentat, bisedë kjo që është përgjuar nga policia e nëpërmjet së cilës u bë e mundur gjetja e 150 mijë biletave të falsifikuara në bagazhin e makinës tip Maserati të Anastas Ibrahimit.
Prej skandalit të falsifikimit, mësohet se shtetit shqiptar i është bërë një dëm që përllogarotet në 1 miliard lek.
