Tregtia me pakicë në tremujorin e tretë pati një rritje vjetore vetëm 0.7 %, raporton INSTAT. Po të kemi parasysh se tremujori i dytë shënoi rënien e madhe -8.3 %, kuptohet se në çfarë katastrofe është zhytur aktiviteti ekonomik. Kjo u reflektua edhe në rënien e shitjeve të karburanteve me -4.8 përqind në tremujorin e tretë. Në këtë situatë bie në sy se çmimet e karburanteve nuk u ulën nga kompanitë megjithëse bursat ndërkombëtare shënuan rënie çmimit për një fuçi nafte. Rritja e çmimeve në fillim të vitit u denoncua edhe në Autoritetin e Konkurrencës, që ka nisi një hetim për këtë çështje.
Tregtia me pakicë
Në tregtinë me pakicë, pa përfshirë këtu tregtinë me pakicë të hidrokarbureve, volumi i shitjeve në tremujorin e tretë 2020 është rritur me 3,0 %, kundrejt tremujorit të tretë të vitit 2019. Në grupin “Ushqime, pije, duhan në njësi tregtare jo të specializuara dhe të specializuara”, volumi i shitjeve është rritur 0,2 %, krahasuar me të njëjtin tremujor të vitit 2019.
Volumi i shitjeve, për grupin “Artikuj jo-ushqimorë në njësi tregtare të specializuara dhe jo të specializuara”, është rritur 5,0 %, kundrejt të njëjtës periudhë të vitit paraardhës.
Tregtia e naftës
Në grupin “Tregti hidrokarbure në njësi tregtare të specializuara”,volumi i shitjeve ka pësuar rënie me 4,8 %, krahasuar me të njëjtin tremujor të vitit 2019. Në tremujorin e dytë rënia vjetore ishte akoma më e madhe 18,3 përqind, raporton INSTAT.
Ndikimi i grupeve në tregtinë me pakicë
Në ndryshimin vjetor prej +0,7 %, në tremujorin e tretë 2020 ndaj tremujorit të tretë 2019, në tregtinë me pakicë, grupet kanë kontribuar si më poshtë:
Grupi “Ushqime, pije e duhan në njësi tregtare jo të specializuara dhe të specializuara” ka kontribuar me + 0,1 pikë përqindje. Grupi “Artikuj jo-ushqimore në njësi tregtare të specializuara dhe jo të specializuara” me 1,9 pikë përqindje dhe grupi “Tregti me pakicë e hidrokarbureve në njësi tregtare të specializuara” me – 1,3 pikë përqindje.
Në tremujorin e tretë 2020, volumi i shitjeve, përshtatur sezonalisht, në grupin “Tregti me pakicë, pa përfshirë këtu tregtinë me pakicë të hidrokarbureve në njësi tregtare të specializuara”, është rritur me 9,9 %, krahasuar me tremujorin paraardhës.
Në karantinë u konsumuan më shumë ushqime
Në grupin “Ushqime, pije, duhan në njësi tregtare jo të specializuara dhe të specializuara”, volumi i shitjeve, përshtatur sezonalisht, është ulur me 0,2 %, krahasuar me tremujorin paraardhës, që korrespondon me kohën e mbylljes prej pandemisë.
Në grupin “Tregti me pakicë hidrokarbure në njësi tregtare të specializuara”, volumi i shitjeve, përshtatur
sezonalisht, është rritur 21,1 %, kundrejt tremujorit të dytë 2020. Pra, duket ndikimi i mbylljes për shkak të pandemisë që nga marsi 2020.
/GazetaReforma.com/
