Pas ngjarjes tragjike në Tiranë, ku një 14-vjeçar humbi jetën nga një sulm me thikë nga një bashkëmoshatar, një tjetër rast shqetësues ka ndodhur në shkollat e juglindjes.
Një nxënës 13-vjeçar nga Bilishti është kapur nga mësuesja me një biçak në çantën e tij, duke ngjallur shqetësime të reja për sigurinë në institucionet arsimore.
Gjatë marrjes në pyetje nga grupi hetimor, 13-vjeçari ka shpjeguar se thikën e kishte blerë një muaj më parë për 100 lekë, pa ndonjë arsye të veçantë.
“E bleva para një muaji, 100 lekë, pa ndonjë arsye, thjesht për qejf. E kisha në shtëpi dhe sot e mora me vete,” ka deklaruar ai në komisariatin e Bilishtit.
Hetimet kanë zbuluar se nxënësi nuk kishte pasur ndonjë konflikt me bashkëmoshatarët dhe se thika nuk kishte pasur qëllim të keq, pasi ai e mbante thjesht për arsye personale.
Incidenti ka shkaktuar një reagim të shpejtë nga autoritetet shkollore, të cilat kërkuan kontrolle më të rrepta të çantave nga mësuesit kujdestarë në shkollat e juglindjes.
Gjatë kontrollit në disa shkolla 9-vjeçare, përveç thikave, janë gjetur edhe produkte kozmetike dhe telefona.
