Besimtarët ortodoksë në mbarë Shqipërinë janë mbledhur për të përkujtuar të Premten e Madhe, një nga ditët më të rëndësishme të kalendarit fetar, kur përkujtohen vuajtjet, kryqëzimi dhe vdekja e Jezus Krishtit.
Ceremonitë fetare janë shoqëruar me procesione tradicionale dhe rite liturgjike në disa qytete të vendit, duke krijuar një atmosferë përkushtimi dhe reflektimi shpirtëror në prag të Pashkëve.
Në Katedrën Ortodokse në Tiranë, qindra besimtarë janë mbledhur për të ndezur qirinj dhe për të ofruar lutjet e tyre. Procesioni solemn, i udhëhequr nga klerikë të Kishës Ortodokse, ka nisur nga katedralja në Sheshin “Skënderbej” dhe është rikthyer në po të njëjtën pikë, në një akt simbolik të devotshmërisë.
Në qytetin e Korçës, ceremonia është zhvilluar përpara Katedrales “Ngjallja e Krishtit”. Epitafet e kishave të qytetit janë bashkuar në një procesion të përbashkët, i cili ka përshkuar bulevardet kryesore të qytetit. Besimtarët, të shumtë në numër, kanë mbajtur qirinj të ndezur dhe kanë përcjellë mesazhe të ringjalljes dhe shpresës.
Tradita është ndjekur edhe në Vlorë, ku pas meshës në Kishën e Shën Todrit, epitafi ka dalë nga kisha në orën 19:30, i shoqëruar nga besimtarë dhe nga Banda Frymore e qytetit, duke krijuar një atmosferë solemne.
Në Durrës, ceremonia është zhvilluar në Kishën Ortodokse “Apostull Pavli dhe Shën Asti”. Pas riteve fetare, procesioni i epitafit ka përshkuar rrugën kryesore të qytetit, me pjesëmarrjen e dhjetëra besimtarëve që mbanin qirinj në duar dhe përçuan një mesazh të fortë besimi, shprese dhe bashkimi shpirtëror.
Të Premten e Madhe, komuniteti ortodoks në të gjithë vendin reflekton mbi sakrificën dhe dashurinë hyjnore, në përgatitje për festën e Ringjalljes që do të kremtohet të dielën e Pashkës.
