Besimtarët e krishterë kanë pritur mbrëmjen e djeshme në katedralen e “Shën Palit” lindjen e Jezusit.
Pavarësisht temperaturave të ulëta kanë qenë të shumtë ata që kanë marrë pjesë në ceremoninë e shenjtë.
Gjatë meshës së mbajtur mbrëmjen e djeshme, Arqipeshkvi, Imzot George Frendo vuri theksin edhe te tragjedia e 26 nëntorit.
Ai u bëri apel të gjithëve që kërkojnë të pasurohen nga kjo tragjedi, duke thënë se është mëkat i madh.
“Për njerëz që në këtë fatkeqësi kërkojnë një vendstrehimi, po rrisnin çmimet e materiale që duhen për ndërtimet, është mëkat i madh, të përfitojnë nga kjo tragjedi për të fituar. U drejtohem atyre që po pasurohen dhe korruptojnë në sajë të tërmetit. U drejtohem me fjalët; qani dhe vajtoni për të këqijat që do vijnë mbi ju”, u shpreh ai.
Edhe në kishën ortodokse, besimtarët kanë kremtuar lindjen e Jezusit dhe janë lutur në emër të tij.
Krishtlindja për besimtarët e krishterë, simbolizon ardhjen e shpëtimtarit në tokë.
Misioni i tij ishte shlyerja e mëkateve të njerëzimit.
Jezusi lindi në Betlehem nga virgjëresha Mari.
Më 25 dhjetor Jezusi nis rrugëtimin, për të përfunduar më pas tek vdekja dhe ringjallja.
