Kreu i Partisë Demokratike, Sali Berisha, gjatë emisionit “Open” në News24, komentoi dekretin e Presidentit Bajram Begaj për caktimin e datës së zgjedhjeve parlamentare më 11 maj.
Ai deklaroi se Presidenti firmosi dekretin e përcaktuar nga Edi Rama.
Berisha theksoi se zgjedhjet nuk do të bojkotohen dhe se opozita vazhdon të kërkojë një qeveri teknike, duke shprehur besimin se në vitin 2025 do të jetë radha e tyre për fitore.
“Do të bëjmë gjithçka për ta larguar nga pushteti, është rradha jonë për të fituar. Kanë ndryshuar dy gjëra shumë të mëdha: janë dy rezoluta të dy organizmave mjaft të mëdha, që janë shkatërrimtare për Edi Ramën dhe regjimin e tij.
Njëra prej është votuar nga 108 parti të qendrës së djathtë në mbarë Botën. Keni rezolutën e PPE-së, ku Edi Rama ka dërguar me dhjetra mesazhe që të mos miratohej rezoluta. Ka dërguar mesazhe duke thënë se do të bënte reformimin e opozitës, me pak fjalë e ka shpallur veten diktator.
Fitorja e Donald Trump e nxjerr Ramën siç është para gjithë Botës. Perandoria e Xhorxh Soros do të shembet. Edi Ramën e ka mbajtur në pushtet perandoria e Soros”, tha Berisha.
Ai tha se Edi Rama në 2021 i bleu zgjedhjet, ndërsa në 2023 përdori mjete shumë më të mëdha dhe 100 mijë vota më shumë mori.
“Kandidatët e Edi Ramës morën miliona, ndërsa ata të opozitës morën zero lekë. Sot Edi Rama u vërsul për Olsin kundër Gazment Bardhit. Olsi është me dokumente, por dosja e Olsit është në agjenci të tjera”, tha Berisha.
