Ish kryeministri Berisha prej datës 16 shtator 2021 ka nisur një lëvizjen e tij të pagëzuar si “Foltorja”, e cila është një bashkëbisedim me demokratë dhe demokrate, me qëllimin për një PD më të fortë, më të bashkuar dhe më të hapur.
Foltoret deri më tani janë zhvilluar në qytetin e Tiranës, Korçës, Shkodrës, Elbasanit, Kukësit dhe Peshkopisë.
Në foltoret e zhvilluara deri më tani lideri historik i demokratëve ka vënë theksin tek protestat masive dhe të fuqishme si e vetmja mënyrë për të rrëzuar qeverinë Rama.
”Edi Rama nuk ikën nga pushteti me votat që kontrollon ai vetë, as me opozitë pupël, ai ikën me protesta të fuqishme për të zezat që i ka bërë këtij vendi. Prandaj ne duhet të ringrihemi. Ne përsëri po bëjmë një figurë jo të mirë sepse ne po tregojmë se nuk kemi tolerancë për fjalën” është shprehur ish kryeministri nga foltorja e Korçës.
Gjithashtu edhe ditën e djeshme, nga foltorja e Dibrës , Berisha u shpreh: Qytetarët, të cilëve Edi Rama iu dhunoi dhe rrëmbeu votën, do të votojnë në sheshet dhe rrugët e Shqipërisë në protestat më të fuqishme që vendi ka njohur. Do votojnë me protestat e tyre.
Në fakt, protestat kanë qenë dhe mbeten një nga armët kryesore të Berishës, për të ngjallur besim dhe adrenalinë të përkrahësit por edhe për të përmbushur qëllimet e tij politike.
Ndërkohë, kujtojmë që Berisha po propozon një mekanizëm që tashmë Basha e ka “konsumuar” në përpjekjet e tij për të rrëzuar qeverinë Rama
Përmendim ciklin e protestave të iniciuar nga opozita për 4 muaj rradhazi në vitin 2019, të cilat nuk ishin gjithmonë paqësore.
Protestat e opozitës kishin elementë dhunë dhe synonin largimin e qeverisë , por qëllimi i tyre nuk u përmbush.
Në këtë rast shikojmë të njëjtën rrugë, por për të arritur rezultate të ndryshme.
Duhet marrë në konsideratë edhe fakti që Berisha ngjall më shumë entuziazëm dhe besim tek ndjekësit në krahasim me Bashën. A mos është kjo “arma” e tij më e fortë?
