Në një postim në rrjetet sociale, kreu demokrat Sali Berisha ka përkujtuar 34-vjetorin e kryengritjes së 2 korrikut 1990, një moment historik në qëndresën e shqiptarëve kundër diktaturës komuniste. Berisha theksoi rëndësinë e kësaj ngjarjeje, duke e cilësuar si një ditë të shënuar në historinë e luftës për liri dhe demokraci.
“Më 2 korrik 1990, mijëra të rinj punëtorë, intelektualë dhe të persekutuar të Tiranës u ngritën kundër diktaturës komuniste dhe, me një guxim epik, shembën në Tiranë Murin e Berlinit, duke hyrë në oborrin e Ambasadës Gjermane dhe ambasadave të tjera,” shkruan Berisha. Ai vlerësoi aktin e guximshëm të protestuesve, të cilët, sipas tij, plagosën për vdekje diktaturën e fundit staliniste në Europë.
Berisha gjithashtu shprehu keqardhjen që qytetarët dhe inteligjencia e Tiranës nuk mbështetën mjaftueshëm kryengritjen, duke mos mbushur rrugët dhe sheshet për të përmbysur regjimin komunist. Megjithatë, ai theksoi se kryengritja e 2 korrikut goditi rëndë dhe bëri të pashpresë diktaturën komuniste në Tiranë, duke dëshmuar se Shqipëria nuk do të mbetej një bastion i socializmit në Europë.
Në përfundim të postimit të tij, Berisha ftoi të gjithë shqiptarët të përulen me mirënjohje dhe nderim të madh për të gjithë ata që morën pjesë në kryengritje. Ai shprehu mirënjohjen e tij të veçantë për ambasadorin gjerman Werner Daum dhe kolegët e tij për mbështetjen e dhënë kryengritësve dhe popullit shqiptar. Berisha nderoi gjithashtu martirin e kryengritjes, të riun 15-vjeçar Artim Basha, i cili humbi jetën në altarin e lirisë së shqiptarëve.
“Kryengritja paqësore e 2 korrikut 1990 goditi rëndë dhe bëri të pashpresë diktaturën komuniste në Tiranë. Ajo me jehonën e saj të jashtëzakonshme dëshmoi se Shqipëria socialiste nuk ishte dhe nuk do të mbetej shkëmb graniti i socializmit në Europë,” përfundoi Berisha.
