Kreu i Partisë Demokratike, Sali Berisha, pritet të paraqitet sot në SPAK pas vendimit të Apelit të GJKKO-së, i cili i caktoi masën e sigurisë “detyrim paraqitje” dy herë në muaj.
Sipas këtij vendimi, Berisha duhet të raportojë pranë SPAK çdo të hënë të parë dhe të tretë të muajit. Paraqitja e tij e parë për muajin janar do të bëhet më 6 janar.
Partia Demokratike ka njoftuar një protestë që do të mbahet para selisë së SPAK-ut në orën 09:30 të mëngjesit.
Protesta synon të mbështesë, sipas PD-së, të drejtën, ligjin dhe të vërtetën, të cilat ata thonë se janë në anën e Berishës.
Njoftimi i plotë:
Ditën e hënë në orën 9:30, mobilizojmë të gjitha strukturat e degëve të Partisë Demokratike për të protestuar para SPAK-ut, si një vegël në duar të Edi Ramës për të persekutuar kundërshtarët politikë. Ne do të jemi aty për të mbështetur të drejtën, ligjin dhe të vërtetën, që janë në anën e Kryetarit të Partisë Demokratike, Prof. Dr. Sali Berisha.
Protesta do të nisë në orën 9:30 përpara selisë së SPAK-ut. Ju ftojmë të gjithë të jeni prezent për të qëndruar të bashkuar në mbështetje të kauzës tonë. Faleminderit!
Vetë Berisha e konsideroi vendimin e Apelit të GJKKO-së pa asnjë bazë ligjore dhe si një “pilulë elektorale” për Edi Ramën. Lideri demokrat është shprehur se vendimi për masën e sigurisë “detyrim paraqitje” nga Apeli i Posaçëm për çështjen “Partizani” është një krim kushtetues. Ai ka deklaruar se prokurorët e SPAK kanë kërkuar vendosjen e masave të sigurisë kundrejt tij me arsyetimin se ai po sulmon Prokurorinë e Posaçme dhe gjykatën.
