Ditën e sotme ashtu siç ishte paralajmëruar ish-kryeministri Sali Berisha, po mban “Foltoren” e radhës në qytetin e Elbasanit.
Nga Elbasani Berisha ka hedhur akuza të forta në drejtim të qeverisë dhe kryeministrit të vendit Edi Rama. Berisha thotë se kryeministri i ka kthyer shqiptarët në “dele të zezë” të Europës.
Ndërsa ka treguar edhe një episod nga qyteti i Gjirokastrës, ku mbajti “Foltoren” , Berisha thotë se çdo gjë ishte e mbyllur aty dhe në sytë e njerëzve nuk kishte shpresë.
Ish-kryeministri e ka përcaktuar atë çfarë ka parë në Gjirokastër si “dramë”.
“Jemi sot në këmbë më të vendosur se kurrë. Sot është një thirrje për çdo shqiptar që të ngrihemi të bashkohemi të hapemi në mënyrë që ti japim përgjigjen e merituar kësaj situate dramatike të krijuar nga vendosja e këtij regjimi në Shqipëri. Edi Rama dhe regjimi i tij ka katandisur Shqipërinë dhe shqiptarët në “delen e zezë” të Ballkanit the Europës. Nga një tokë e bekuar e ka kthyer në një vend pa shpresë nga i cili të rinjtë vetëm ikin dhe vetëm ikin.
Kur isha në Gjirokastër para dy ditësh i zoti i hotelit kishte bërë diçka të bukur për të përfaqësuar vendin në mënyrë dinjitoze. Po sa dilje nga hoteli shikoje dramën me vargun e dyqaneve të mbyllur, shkretëtirë plotësisht. Por çfarë ka bërë Edi Rama? Shtro kalldrëm dhe vidh para asgjë tjetër asnjë projekt në Gjirokastër”, u shpreh Berisha.
