Pas përfundimit të takimit me Presidentin Ilir Meta, ish-kryeministri Sali Berisha ka komentuar ngërçin në Gjykatën Kushtetuese.
Berisha ka folur me tone të ashpra dhe ka akuzuar kryeministrin Edi Rama për kapjen e KLP dhe KED.
Sipas tij, kreu i KLP ndodhet aty për t’i shërbyer Edi Ramës.
Ndër të tjera lideri historik i demokratëve tha se Ardian Dvorani është i vetmi gjykatës, që ka shkelur në mbledhje partiake.
“Në këtë takim me Presidentin diskutuam gjerësisht për krizën madhore që mafia e Edi Ramës në përpjekjet e shpërfytyruara për të kapur gjithë sistemin e drejtësisë krijoi edhe në organin, që me ligj është garant i Kushtetutës së Shqipërisë. Tani është një moment kyç dhe vendimtar për çdo qytetar shqiptar, por duhet të theksoj se ju mediat keni një rol jashtëzakonisht të rëndësishëm, sepse me të drejtë ju keni lakuar më shumë se çdo gjë tjetër, gjatë këtyre katër viteve, të paktën 20 herë më shumë Reformën në Drejtësi, sesa integrimin në BE. Është në detyrimin tuaj t’u thoni të vërtetën shqiptarëve, se si kjo reformë po sjell në mënyrë të lemeritshme kapjen e saj nga mafia e narkoshtetit shqiptar. Cilido që ka dyshimin më të vogël, i rikujtoj se KLP e sotme kryesohet nga një individ, kunati i ndrikullës së radarëve, që është në kundërshtim me Kushtetutën, sepse kërkohet të jetë magjistrat, por jo kunat. Ai është aty për t’i shërbyer si skllav Edi Ramës. Cilido që dyshon, i bëj një pyetje: A mund të na thoni cili gjykatës, në historinë 30-vjeçare të këtij vendi, ka shkelë në mbledhje partiake, ai është vetëm një, mafiozi Ardian Dvorani, në mbledhjet e PS”, tha Berisha.
Përsa i përket shpërndarjes së Parlamentit, Berisha u shpreh se nuk e ka diskutuar këtë çështje me Metën, por nëse do të ishte president do ta kishte bërë.
“Nuk kam diskutuar për shpërndarje Parlamenti. Absolutisht do ta kisha shpërndarë. Ky Parlament në vlerësimin tim nuk mund të mblidhej kurrë në shtatorin që kaloi, pa shpallur gjendje të jashtëzakonshme, sepse Parlamenti është në thyerje të rëndë të Kushtetutës. Ai Parlament meritonte gozhdimin e dyerve që në shtator”, vijoi Berisha.
