Pasditen e sotme kryetari i PD Sali Berisha ka zhvilluar një bashkëbisedim me Forumin Rinor të Partisë Demokratike. Berisha tha se më datë 7 korrik do të dalë në protestë me qëllimin e vetëm për të rrëzuar qeverinë e Ramës dhe për të dalë nga monizmi.
“Zbresim më 7 korrik në shesh. Zbres me qëllimin më të vendosur për të filluar një stinë të re në betejën e tyre për të dalë nga monizmi, në rrafshin politik. Monizmi e liria, monizmi dhe demokracia janë të papajtueshme me njëra-tjetrën. Monizmi nuk pranon lirinë, nuk pranon demokracinë. Ky zotëri që sot qeveris duke vjedhur me firmat e tij, me mafien e tij po iu ofron ju vetëm kanabisin, paratë e krimit, si shkëmbim për mohimin e votës, për mohimin e lirive,”tha Berisha.
Gjithashtu Berisha u shpreh se të rinjtë janë në krye të misionit të Partisë Demokratike për të shpëtuar Shqipërinë. Berisha ftoi çdo të ri t’i bashkohet lëvizjes së madhe për të shpëtuar vendin në këto kohë kritike.
“Nëse PD ka një mision së bashku me forcat e tjera opozitare shpëtimin e Shqipërisë në këto kohëra kritike për të, në krye të këtij misioni qëndron FRPD, qëndrojnë të rinjtë opozitarë. Të bashkohemi në një lëvizje të madhe. Duhet t’u rikthejë liritë e vërteta shqiptarëve”,tha Berisha.
