Gjykata e Posaçme ka refuzuar kërkesën e Ilir Beqajt dhe Ermal Kurtulajt për ndryshimin e masës së sigurisë, duke lënë në fuqi “arrestin në burg” dhe duke pranuar kërkesën e prokurorisë për zgjatjen e hetimeve dhe paraburgimit me tre muaj.
Gjatë seancës, Beqaj dhe avokati i tij, Ermal Yzeiraj, u dakordësuan për zgjatjen e afateve hetimore dhe kërkuan hetime shtesë, por insistuan në ndryshimin e masës së sigurisë.
Gjykata argumentoi se nuk mund të ndryshohej masa në këtë fazë hetimore, pasi ekzistojnë dyshime se të akuzuarit mund të largohen nga vendi.
Beqaj, Kurtulaj dhe Alfred Nikollaj u arrestuan më 4 korrik nga SPAK në lidhje me hetimet për abuzimet me fondet e Bashkimit Evropian, gjatë periudhës kur Beqaj udhëhoqi SASPAC.
