Një 40-vjeçar ka rënë në prangat e policisë ditën e sotme në Tiranë. Sipas njoftimit zyrtar të policisë mësohet se bëhet fjalë për shtetasin Ritvan Xhota. Ky i fundit u ndalua teksa lëvizte me një motomjet në rrugën “Bajram Curri” dhe gjatë kontrollit në çantën e tij iu gjetën dhe sekuestruan, një armë zjarri pistoletë, një krehër dhe municion luftarak. Ky arrestim ishte pjesë e operacionit policor të koduar “Black bag”, për goditjen e veprimtarisë kriminale në fushën e armëmbajtjes pa leje.
NJOFTIMI I POLICISË
Operacioni, i zhvilluar nga Forca e Posaçme “Shqiponja”.
Qarkullonte me armë zjarri me vete, vihet në pranga 40-vjeçari.
Sekuestrohen një armë zjarri pistoletë, një krehër dhe municion luftarak.
Shërbimet e Forcës së Posaçme “Shqiponja”, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e marra në rrugë operative se në bulevardin “Bajram Curri”, një shtetas i armatosur po lëvizte me një motomjet, kanë organizuar punën dhe kanë finalizuar me sukses operacionin policor të koduar “Black bag”.
Si rezultat i këtij operacioni, u bë kapja dhe arrestimi në flagrancë i shtetasit:
– R. Xh., 40 vjeç, banues në Tiranë, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Gjatë kontrollit të çantës së këtij shtetasi, në bulevardin “Bajram Curri”, shërbimet e Forcës së Posaçme “Shqiponja”, gjetën dhe sekuestruan, në cilësinë e provës materiale, një armë zjarri pistoletë, një krehër dhe municion luftarak. Materialet i kaluan Prokurorisë, për veprime të mëtejshme procedurale.
