Deputetja e PDK-së, Florete Zejnullahu, në seancën e sotme të Kuvendit të Kosovës ka thënë se është kërcënuar nga bashkëshorti i presidentes së Kosovës, Vjosa Osmanit, Prindon Sadriu.
“Të nderuar para jush dua të paraqes kërcënimin që kam marr nga bashkëshorti i zonjës Osmani, Prindon Sadriu. I rrethuar me pushtetin e bashkëshortes dhe partnerit të saj qeverisës, Albin Kurti ai ka marrë guximin të kërcënoj deputetët e Kuvendit, pas publikimit të fakteve ndaj tij dhe jetës luksoze që ai dhe bashkëshortja e tij bëjnë”, ka thënë fillimisht Zjenullahu.
Më pas, deputetja shtoj: “Do ta padis në organet e drejtësisë për kërcënimin që më ka bërë menjëherë pas kësaj seance. Në letrën kërcënuese, burri i presidentes mundohet të fshehë të vërtetën, duke thënë se vendi ku ndodhet shtëpia e tij është vetëm një vend punishte. Ai në letrën kërcënuese shkon aq larg sa që etiketon edhe mediat që kanë publikuar fjalimin tim, si Gazetën Express dhe Gazetën Insajderi, duke i përmendur me emra”, u shpreh ajo.
Në seancën e kaluar parlamentare, deputetja e PDK-së kishte publikuar disa shifra, duke thënë se Vjosa Osmani dhe burri i saj po marrin mijëra euro nga buxheti i shtetit dhe që po bëjnë jetë luksoze.
