Përfaqësuesja e Lartë për Politikë të Jashtme dhe Siguri, Kaja Kallas, ka njoftuar se Bashkimi Evropian ka filluar heqjen e masave ndëshkuese që janë aplikuar ndaj Kosovës prej dy vitesh.
Gjatë një konference për media në Prishtinë, Kallas theksoi se situata në veri duhet të qetësohet, pasi mbyllja e strukturave paralele atje nuk ndihmon në uljen e tensioneve.
“Si një sinjal për angazhimin tonë, BE-ja ka nisur gradualisht heqjen e masave të vendosura në qershor të vitit 2023. Ky hap krijon mundësi të reja për zhvillimin e Kosovës dhe afrimin me Evropën, por është i lidhur ngushtë me ruajtjen e qetësisë në veri,” tha ajo.
Kallas gjithashtu paralajmëroi se mbyllja e strukturave të mbështetura nga Serbia do të dëmtojë përpjekjet për stabilizim në këtë zonë.
