Shqipëria ka marrë 64.5 milionë euro si parafinancim nga Plani i Rritjes së BE-së për Ballkanin Perëndimor, një mbështetje financiare që synon të ndihmojë në zbatimin e reformave dhe investimeve për afrimin e vendit me Bashkimin Evropian.
Lajmi u bë i ditur nga Ambasada e BE-së në Shqipëri përmes një postimi në rrjetin social “X”. Ambasadori Silvio Gonzato e cilësoi këtë si një moment të rëndësishëm në rrugëtimin e vendit drejt anëtarësimit në BE.
“Plani i Rritjes forcon ekonominë, sundimin e ligjit dhe mbështet një Shqipëri më të gjelbër. BE-ja qëndron krah Shqipërisë në rrugën e saj drejt anëtarësimit,” u shpreh Gonzato.
Nga ky financim fillestar, 30 milionë euro janë dhënë si kredi koncesionare për buxhetin e shtetit për të mbështetur reformat, ndërsa 34.5 milionë euro të tjera do të injektohen në WBIF (Western Balkans Investment Framework) për investime në infrastrukturë.
Kryenegociatorja Majlinda Dhuka e vlerësoi këtë financim si një shenjë besimi nga BE-ja ndaj progresit të Shqipërisë. Ajo theksoi se vendi është i motivuar për të vijuar reformat dhe përmbushjen e kritereve për anëtarësim.
Deri në vitin 2027, Shqipëria ka mundësinë të përfitojë deri në 922.1 milionë euro nga Fondi i Reformës dhe Rritjes, me kushtin që të zbatojë reforma në fusha si sundimi i ligjit, energjia e rinovueshme, ekonomia dixhitale dhe zhvillimi i sektorit privat.
Disbursimet e ardhshme do të varen nga përparimi në zbatimin e reformave të dakorduara me Komisionin Evropian. Nëse Shqipëria përmbush angazhimet e përcaktuara në Axhendën e Reformave, BE do të zhbllokojë fonde të tjera.
Plani i Rritjes për Ballkanin Perëndimor synon të sjellë ekonomitë e rajonit më pranë BE-së, duke lehtësuar integrimin gradual në tregun e vetëm dhe duke u mundësuar qytetarëve përfitime të hershme nga procesi i anëtarësimit.
Ai përfshin një mbështetje financiare prej 6 miliardë eurosh për reformat socio-ekonomike dhe investimet strategjike në vendet e rajonit.
Aktualisht, Komisioni Evropian po vlerëson hapat e parë të reformave, të cilat, nëse përmbushen me sukses, do të sjellin disbursime të mëtejshme financiare për Shqipërinë.
