Bashkimi Europian i ka të qarta mesazhet për Kosovës sa i përket marrëdhënieve dhe dialogut me Serbinë. Zëdhënësi i BE për Punë të Jashtme dhe Siguri, Peter Stano ka thënë për Klan Kosova se prioritetet që ka vendosur qeveria Kurti sa i përket politikës së brendshme janë shumë të rëndësishme. Por gjithashtu prioriteti më i rëndësishëm i politikëssë jashtme për Kosovën është dialogu me Serbinë dhe këto nuk mund të shihen si çështje të ndara.
“Kur bëhet fjalë për prioritetet e Qeverisë, nuk ka konkurrencë në mes prioriteteve individuale. Prioritetet e brendshme të Kurtit janë shumë të rëndësishme. Por, në të njëjtën kohë dialogu është prioriteti më i rëndësishëm i politikës së jashtme të Kosovës dhe nuk duhet të shihet si i ndarë apo që s’përputhet me prioritetet tjera që i ka përmendur kryeministri”, ka thënë Stano.
Kurti dhe ministrja e Jashtme, Donika Dërvalla kanë përsëritur këtë të mërkurë prioritetet e qeverisë në një takim virtual që kanë pasur me udhëheqësit e misioneve diplomatike të Bashkimit Europian në Kosovë.
Ndërkohë Stano ka thënë se BE pret që autoritetet e reja në Kosovë të angazhohen dhe të shfrytëzojnë mundësinë për ta përfunduar procesin me sukses.
“BE-ja dhe shtetet anëtare presin që autoritetet e reja në Prishtinë të angazhohen në mënyrë konstruktive me qëllim vazhdimin e takimeve në dialogun e lehtësuar nga BE-ja dhe të shfrytëzojnë mundësinë që kanë përpara tyre për të sjellë këtë proces të rëndësishëm në një përfundim të suksesshëm”, tha Stano.
