Bashkimi Evropian dhe Meksika kanë shprehur shqetësim të thellë pas kërcënimit të Presidentit amerikan Donald Trump për vendosjen e tarifave të reja deri në 30% ndaj importeve nga këto vende, që pritet të hyjnë në fuqi më 1 gusht.
Qeveria meksikane e ka cilësuar këtë vendim si “të padrejtë dhe të papranueshëm”, duke theksuar se nuk do të lejojë që sovraniteti i saj të cenohet nga presione të huaja.
Ndërkohë, presidentja e Komisionit Evropian, Ursula von der Leyen, ka paralajmëruar se BE do të ndërmarrë “kundërmasa proporcionale”, nëse Shtetet e Bashkuara vendosin të zbatojnë këto tarifa.
Megjithatë, të dyja palët shprehën gatishmëri për të vijuar dialogun me Uashingtonin në përpjekje për të shmangur një përshkallëzim të mëtejshëm.
Në një letër drejtuar von der Leyen, presidenti Trump ka akuzuar Bashkimin Evropian për një marrëdhënie të pabalancuar tregtare, duke përmendur deficitin e lartë në favor të BE-së si pasojë e, sipas tij, barrierave tarifore dhe jotarifore që dëmtojnë eksportet amerikane.
Letra të ngjashme janë dërguar edhe drejt autoriteteve meksikane, duke përmbajtur paralajmërime të qarta: çdo kundërpërgjigje me masa tregtare do të sjellë tarifa edhe më të larta, deri në 30%.
Tensionet nuk janë kufizuar vetëm te BE-ja dhe Meksika. Trump ka njoftuar gjithashtu vendosjen e tarifave ndaj mallrave nga Japonia, Koreja e Jugut, Kanadaja dhe Brazili, masa që do të hyjnë në fuqi nga muaji i ardhshëm.
Këto lëvizje kanë rritur frikën për një përplasje të re tregtare në nivel global, që mund të ketë pasoja të gjera për ekonominë botërore.
