Menduam se më në fund na shpëtuan sytë dhe veshët nga Veliaj tani që është pas hekurave. Por duket se Lali Euro s’ka ndërmend të na shqitet as nga qelia! Në vend që të reflektojë mbi akuzat për korrupsion dhe pastrim parash, ai na servir mend për punët e qytetit nga burgu.
“Edhe pse i burgosur pa gjyq, me një dosje të kopsitur enkas për të më mbajtur larg punëve të qytetit, puna për ndërtimin e shkollave të reja në Tiranë nuk ndalet!” shkruan nga qelia.
Shfaqja e turpit nisi që në momentin e arrestimit. ABC News, News24 dhe Report TV na shërbenin “lajme” për aktivitete të kryebashkiakut gjoja në kohë reale, ndërkohë që ai po merrte rrugën për në paraburgim.
E gjithë kjo paradë e turpshme e medias dhe “yjeve” të Tiranës na kujton se si vepron sistemi i ndërtuar nga Veliaj. Si kukulla në duart e një mjeshtri të korruptuar, pseudo-artistët që kanë gëlltitur miliona nga fondet e bashkisë u aktivizuan menjëherë. Në një kor servil, u derdhën lotët e krokodilit për “transformuesin” e Tiranës.
Në listën e “VIP-ave” të blerë nga Lali Euro janë edhe ata që fillimisht dolën në protestë kundër shembjes së Teatrit Kombëtar. Këta artistë që dikur ulërinin për mbrojtjen e trashëgimisë kulturore u shndërruan në kameleonë sapo panë shkëlqimin e parasë. Ndërgjegja e tyre u shit për disa kontrata nga bashkia, ndërsa godina historike u bë rrafsh me tokën.
Në prapaskenë qëndron dosja e eventeve me protagonist Fatjon Sallakun, i transferuar strategjikisht prej Erion Veliajt nga Ministria e Rinisë dhe Mirëqenies Sociale në Bashkinë e Tiranës. Sallaku u emërua shef i Eventeve dhe Emergjencave, duke mundësuar vjedhje në shifra marramendëse të parave publike. Çdo festival, çdo koncert u kthye në një lavazh gjigant për pastrimin e parave të qytetarëve.
Tani që gjyqi vazhdon, jemi dëshmitarë të një spektakli të turpshëm – një i akuzuar për korrupsion në shkallë të gjerë që vazhdon të na japë leksione qytetarie nga burgu. Një bandë propagandistësh që përdorin paratë tona për të na bindur se duhet të ndjejmë keqardhje për atë që na vodhi.
Ndërsa drejtësia (shpresojmë) bën punën e saj, sa gjatë do të vazhdojmë të paguajmë për propagandën e një njeriu që duhet të përballet me pasojat e veprimeve të tij? Sa gjatë do të vazhdojë ky batalion vjedhjesh dhe propagande të veprojë, tani me komandantin e tyre prapa hekurave?
/gazetareforma.com
